గుండెపోటును ముందే గుర్తించే పరికరం...!

లండన్ , మార్చి 21:  రక్తంలోని పదార్థాలను, జీవక్రియలను పసిగట్టడం ద్వారా గుండెపోటును కొన్ని గంటల ముందుగానే గుర్తించే ఓ పరికరాన్ని స్విస్ శాస్త్రవేత్తలు కనుగొన్నారు. చర్మం కింద అమర్చే ఈ ఇంప్లాంట్ 24 గంటలపాటూ రక్తంలోని ఐదు రకాల పదార్థాలను పరిశీలిస్తుంది. 1.4 సెం.మీ. మాత్రమే ఉండే ఈ పరికరం చర్మంపై అమర్చే చిన్న ప్యాచ్ నుంచి విద్యుత్‌ను గ్రహించి పనిచేస్తుంది. గుండెకు ఇబ్బందిగా పరిణమించే పదార్థాలను, జీవక్రియల్లో తేడాలను గుర్తించిన వెంటనే ఇది బ్లూటూత్ ద్వారా స్మార్ట్‌ఫోన్‌కు లేదా టాబ్లెట్‌కు సమాచారం పంపుతుంది. వాటి నుంచి ఇంటర్‌నెట్ ద్వారా నేరుగా వైద్యుడి కంప్యూటర్‌కు సమాచారం అందుతుంది. దీంతో వైద్యుడి సూచనల మేరకు రోగి ముందుగానే జాగ్రత్తపడే అవకాశం కలగనుంది. ఇది మరో నాలుగేళ్లలోగా అందుబాటులోకి వచ్చే అవకాశముంది.