వింబుల్డన్ మహిళల సింగిల్స్ విజేత బర్తోలీ ...

లండన్, జులై 7:  ఏమాత్రం అంచనాలు లేకుండా వింబుల్డన్ టోర్నమెంట్‌లో అడుగుపెట్టిన 28 ఏళ్ల  ఫ్రాన్స్ క్రీడాకారిణి బర్తోలీ  విజేతగా అవతరించింది. శనివారం జరిగిన మహిళల సింగిల్స్ ఫైనల్లో 15వ సీడ్ బర్తోలీ 81 నిమిషాల్లో 6-1, 6-4తో 23వ సీడ్ సబైన్ లిసికి (జర్మనీ) పై విజయం సాధించింది. కెరీర్‌లో 47వ గ్రాండ్‌స్లామ్ టోర్నీ ఆడిన బర్తోలీకిదే తొలి గ్రాండ్‌స్లామ్ టైటిల్ కావడం విశేషం. 2007లో వింబుల్డన్ టోర్నమెంట్‌లో తొలిసారి ఫైనల్‌కు చేరిన బర్తోలీ టైటిల్ పోరులో వీనస్ విలియమ్స్ (అమెరికా) చేతిలో ఓడిపోయి రన్నరప్‌గా నిలిచింది. ఆరేళ్ల తర్వాత అదే టోర్నమెంట్‌లో... అదే వేదికపై... అంతిమ సమరంలో ఓడిపోయిన చోటే విజేతగా నిలిచింది.  బర్తోలీకి వింబుల్డన్ ట్రోఫీతోపాటు 16 లక్షల పౌండ్లు (రూ. 14 కోట్ల 36 లక్షలు) ప్రైజ్‌మనీగా లభించింది. రన్నరప్ లిసికి ఖాతాలో 8 లక్షల పౌండ్లు (రూ. 7 కోట్ల 18 లక్షలు) చేరాయి. అగ్రశ్రేణి క్రీడాకారిణులను ఓడించి టైటిల్ పోరుకు చేరిన లిసికి ఫైనల్లో ఓటమి తర్వాత కన్నీళ్లపర్యంతమైంది.