అమెరికాలో వివాహిత ఆత్మహత్య

 నెల్లూరు,నవంబర్ 2:  భర్త వేధింపులు తట్టుకోలేక ఓ వివాహిత అమెరికాలో ఆత్మహత్య చేసుకున్న సంఘటన   వెలుగు చూసింది. నెల్లూరు జిల్లా బుచ్చిరెడ్డిపాళేనికి చెందిన మునగల  సరిత బెనారస్ వర్సిటీలో ఎంటెక్ పూర్తి చేసింది. హైదరాబాద్ సంతోష్ నగర్‌కు చెందిన సాఫ్ట్‌వేర్ ఇంజినీర్ అన్నపురెడ్డి సుధీర్‌రెడ్డిని  గతేడాది అక్టోబరు 9న  వివాహమాడింది.ఆతర్వాత మూడు నెలలకు సుధీర్‌రెడ్డి అమెరికా వెళ్లిపోయాడు. ఆ సమయంలో సరితకు వీసా రానందున పుట్టింటికి వచ్చేసింది. గత నెల నాలుగో తేదీన ఆమె అమెరికా వెళ్లింది. అప్పటికే  సరిత భర్త నిక్కీ అనే మరో మహిళతో వివాహేతర సంబంధం సాగిస్తున్నాడు. సరితను ఒంటరిగా వదలి రాత్రి పూట నిక్కీ ఇంటి కి వెళ్లేవాడు. విడాకులు ఇవ్వమని భర్త పెడుతున్న వేధింపులు తట్టుకోలేక సరిత శుక్రవారం తెల్లవారుజామున ఆత్మహత్య చేసుకుంది.తన అవయవాలు దానం చేయాలని  ఆమె తన సూసైడ్ నోట్ లో పేర్కొంది.