ప్రాణహిత-చేవెళ్ల పై మహారాష్ట్ర తో ఒప్పందం

న్యూఢిల్లీ, మే 5:   ప్రాణహిత-చేవెళ్ల ప్రాజెక్టుపై మహారాష్ట్ర, ఆంధ్రప్రదేశ్ రాష్ట్రాల మధ్య ఒప్పందం కుదిరింది. దివంగత నేత డాక్టర్ వైఎస్ హయాం లో దీని నిర్మాణానికి  శంకుస్థాపన జరిగింది. 40వేల కోట్ల రూపాయల వ్యయంతో నిర్మించే ఈ ప్రాజెక్టు ద్వారా తెలంగాణలోని 7 జిల్లాలకు 160 టిఎంసిల సాగునీరు, తాగు నీరు అందుతుంది. హైదరాబాద్‌కు కూడా 30 టీఎంసీల తాగునీరు అందుతుంది. ఈ ప్రాజెక్టు తెలంగాణ ప్రాంతానికి లైఫ్‌లైన్ లాంటిదని ముఖ్యమంత్రి కిరణ్ కుమార్ రెడ్డి చెప్పారు. నిర్దిష్ట కాలపరిమితిలోనే ప్రాణహిత-చేవెళ్ల ప్రాజెక్టు పూర్తి చేస్తామని ముఖ్యమంత్రి చెప్పారు.  ప్రాజెక్టు డిజైన్ మార్పులపై నిపుణుల కమిటీ పర్యవేక్షిస్తుందన్నారు. ప్రాజెక్టు జాతీయ హోదా సాధించేందుకు ఈ ఒప్పందం ఉపయోగపడుతుందని చెప్పారు. మహారాష్ట్ర ముందుకు రావడం వల్ల ముంపు సమస్య పరిష్కారం సులభతరం అయిందన్నారు. ఇతర రాష్ట్రాలతో వివాదాలను పరిష్కరించుకునేందుకు తాము సిద్ధంగా ఉన్నామని చెప్పారు. కృష్ణా జలాల అంశంపై టిఆర్ఎస్ అధ్యక్షుడు కె.చంద్రశేఖర రావు వ్యాఖ్యలను పట్టించుకోవాల్సిన అవసరం లేదన్నారు.