బీబీసీ హిందీ రేడియో కొనసాగింపు

లండన్  ,జూన్ 24 :  బీబీసీ హిందీ రేడియో మూసివేత ప్రమాదం  నుంచి బయటపడింది. ఈ రేడియోతోపాటు, బీబీసీ అరబిక్ రేడియోను ఇకముందూ కొనసాగించేందుకు నిధులు కేటాయిస్తున్నట్లు బ్రిటన్ విదేశాంగ మంత్రి విలియం హేగ్ ప్రకటించారు. విదేశీ, కామన్వెల్త్ ఆఫీస్ బడ్జెట్ నుంచి బీబీసీ వరల్డ్ సర్వీసుకు వచ్చే మూడేళ్లకు గాను ఏటా 22 లక్షల పౌండ్లు ఇస్తామని ఆయన పార్లమెంటు దిగువ సభ ‘హౌజ్ ఆఫ్ కామన్స్’లో ప్రకటించారు. అలాగే బీబీసీ ట్రస్టు ఈ సర్వీసు కోసం 90 లక్షల పౌండ్లను తిరిగి కేటాయించిందని వెల్లడించారు. ఖర్చుల తగ్గింపులో భాగంగా హిందీ సహా ఐదు భాషల రేడియో ప్రసారాలకు స్వస్తి పలకాలని బీబీసీ ఈ ఏడాది జనవరిలో నిర్ణయించింది. దీనిపై భారత్, బ్రిటన్‌లో నిరసనలు వెల్లువెత్తిన నేపథ్యంలో హిందీ, అరబిక్ ప్రసారాలను కొనసాగించాలని నిర్ణయం తీసుకుంది.