ప్రపంచకప్: న్యూజిలాండ్ పై ఆస్ట్రేలియా ఘనవిజయం

నాగ్‌పూర్ ,ఫిబ్రవరి 25: వరల్డ్ కప్ లో శుక్రవారం జరిగిన గ్రూప్ ‘ఎ’ లీగ్ మ్యాచ్‌లో ఆస్ట్రేలియా ఏడు వికెట్ల తేడాతో న్యూజిలాండ్ పై  ఘనవిజయం సాధించింది. తొలుత బ్యాటింగ్‌కు దిగిన న్యూజిలాండ్ 206 పరుగులకు ఆలౌట్ కాగా... ఆస్ట్రేలియా కేవలం 34 ఓవర్లలో 3 వికెట్లు కోల్పోయి 207 పరుగులతో లక్ష్యాన్ని అధిగమించింది. పేసర్ మిచెల్ జాన్సన్‌కు ‘మ్యాన్ ఆఫ్ ది మ్యాచ్’ అవార్డు లభించింది. తమ తదుపరి మ్యాచ్‌ల్లో న్యూజిలాండ్ మార్చి 4న జింబాబ్వేతో; ఆస్ట్రేలియా మార్చి 5న శ్రీలంకతో తలపడతాయి. ప్రపంచకప్‌లో ఆస్ట్రేలియాకిది వరుసగా 25వ విజయం కావడం విశేషం. 1999 ఫైనల్ నుంచి ఆస్ట్రేలియా ప్రపంచకప్‌లో ఆడిన ప్రతి మ్యాచ్‌లోనూ గెలిచింది.

బంగ్లాదేశ్ తొలి విజయం,

 కాగా, ఢాకా లో  శుక్రవారం జరిగిన గ్రూప్ ‘బి’ లీగ్ మ్యాచ్‌లో బంగ్లాదేశ్ 27 పరుగుల ఆధిక్యంతో ఐర్లాండ్‌పై నెగ్గి తొలి విజయాన్ని నమోదు చేసుకుంది. టాస్ గెలిచి బ్యాటింగ్ ఎంచుకున్న బంగ్లాదేశ్ 49.2 ఓవర్లలో 205 పరుగులకు ఆలౌటైంది.  206 పరుగుల లక్ష్యంతో ఇన్నింగ్స్ ప్రారంభించిన ఐర్లాండ్ 45 ఓవర్లలో 178 పరుగులకు ఆలౌటైంది. ఒకదశలో 151 పరుగులకు ఐదు వికెట్లతో లక్ష్యం దిశగా పయనిస్తున్న ఐర్లాండ్‌ను బంగ్లాదేశ్ పేసర్ షఫీయుల్ ఇస్లామ్ (4/21) దెబ్బతీశాడు. షఫీయుల్ ధాటికి ఐర్లాండ్ చివరి ఐదు వికెట్లు 27 పరుగుల తేడాతో పడిపోయాయి.  బంగ్లాదేశ్ ఓపెనర్ తమీమ్ ఇక్బాల్‌కు ‘మ్యాన్ ఆఫ్ ది మ్యాచ్’ అవార్డు లభించింది.